پاکستان کرکٹ بورڈ نے مختلف کھلاڑیوں کے کورونا سے متاثر ہونے کے باعث پاکستان سپر لیگ 06 (پی ایس ایل 2021 ) کے چھٹے ایڈیشن کو ملتوی کرنے کا فیصلہ کیا ہے۔
پاکستان کرکٹ بورڈ میں شریک فرنچائز کراچی کنگز کے میڈیا منیجر فیصل مرزا کے مطابق پاکستان سپر لیگ کو ملتوی کر دیا گیا ہے اور پاکستان کرکٹ بورڈ کچھ دیر میں اس بارے میں باضابطہ اعلان کرے گا۔
یاد رہے کہ گذشتہ برس بھی پاکستان سپر لیگ کے پانچویں ایڈیشن کو ملک میں کورونا کے بڑھتے کیسز کے باعث مارچ میں ملتوی کر دیا گیا تھا اور بقیہ میچز نومبر میں کروائے گئے تھے۔
بی بی سی نیوز کے عبدالرشید شکور کے مطابق جس ہوٹل میں ٹیمیں ٹھہری ہیں وہاں بایو سکیور ببل اور ایس او پیز پر مکمل عملدرآمد نہیں کیا گیا۔ ایک کرکٹر کی برتھ ڈے پارٹی ہوئی باہر سے کھانے منگوائے جاتے رہے ہیں۔
بایو سکیور ببل کی اصطلاح کا مطلب یہ ہے کہ کھلاڑی اور آفیشلز اور متعلقہ عملہ وہ عام لوگوں سے دور رہے۔ ٹورنامنٹ کے قواعد و ضوابط میں یہ شامل تھا کہ ان سب کا عام لوگوں سے میل جول نہیں ہو گا اوران کا کھانا پینا بھی علیحدہ ہو گا۔ بایو سکیور ببل کے تصور کے تحت کھلاڑیوں کو بیرونی دنیا سے بالکل میل جول رابطہ منقطع کر دیا جاتا ہے۔
پی سی بی اور ٹیموں کے مالکان کے درمیان منعقدہ ورچوئل میٹنگ کے بعد پاکستان کرکٹ بورڈ نے ایچ بی ایل پاکستان سپر لیگ 6 پی ایس ایل 2021 کو فوری طور پر ملتوی کرنے کا اعلان کیا ہے۔ یہ فیصلہ پی ایس ایل میں شریک دو ٹیموں کے سات کھلاڑیوں میں کورونا ٹیسٹ مثبت آنے کے بعد کیا گیا ہے۔ پی سی بی اب فوری طور پر تمام چھ ٹیموں کے شرکا کی پی سی آر ٹیسٹنگ، کورونا ویکسین اور آئسولیشن سہولیات کے لیے اقدامات کرے گا۔
کراچی کنگز سے وابستہ سابق ٹیسٹ کرکٹر وسیم اکرم نے بی بی سی کو اس بات کی تصدیق کی ہے کہ ڈاکٹرز نے انھیں مشورہ دیا ہے کہ وہ فوری طور پر ہوٹل چھوڑ کر اپنے گھر منتقل ہو جائیں کیونکہ وہ ذیابیطس کے مریض ہیں لہٰذا موجودہ صورتحال میں انھیں زیادہ احتیاط کی ضرورت ہے۔
پاکستان کرکٹ بورڈ کے چیف ایگزیکٹو وسیم خان اور ڈائریکٹر کمرشل بابر حامد آج سہ پہر تین بجے نیشنل اسٹیڈیم کراچی میں منعقدہ پریس کانفرنس میں مزید تفصیلات سے آگاہ کریں گے۔ پریس کانفرنس روم میں محدود جگہ کے باعث ویڈیو کیمرہ پرسنز کو پریس کانفرس میں شرکت کی اجازت نہیں ہو گی تاہم پی سی بی اپنے یو ٹیوب چینل پر پریس کانفرنس کو لائیو اسٹریم کرے گا۔
اس سے قبل آسٹریلین کرکٹر ڈین کرسٹین نے ایچ بی ایل پی ایس ایل 6 سے دستبرداری کا فیصلہ کیا تھا۔ اطلاعات کے مطابق کراچی کنگز کے آلراؤنڈر ڈین کرسٹین 12 بجے کی فلائٹ سے دبئی روانہ ہوجائیں گے۔ اس صورتحال پر سابق ٹیسٹ کرکٹر راشد لطیف کا کہنا ہے کہ ’پی ایس ایل ملتوی کیے جانے میں فرنچائز اتنے ہی ذمہ دار ہیں جتنا پاکستان کرکٹ بورڈ۔‘
اس قبل پاکستان کرکٹ بورڈ نے آج صبح اعلان کیا کہ ملک میں جاری پاکستان سپر لیگ 6 پی ایس ایل 2021 کی دو ٹیموں میں مزید تین کھلاڑیوں کے کورونا ٹیسٹ کی رپورٹ مثبت آئی ہے۔ حکام کے مطابق یہ تینوں کھلاڑی اب 10 روز تک آئسولیشن میں رہیں گے۔ تاہم پی سی بی کی جانب سے متاثرہ کھلاڑیوں اور ٹیموں کے نام ظاہر نہیں کیے گئے ہیں۔ پی سی بی کی جاری کردہ پریس ریلیز کے مطابق ان تینوں کھلاڑیوں نے بدھ کے روز پی ایس ایل 6 کے منعقدہ ڈبل ہیڈر میچز میں شرکت نہیں کی۔ ان تینوں کھلاڑیوں میں علامات ظاہر ہونے کے بعد ان کے کورونا ٹیسٹ گذشتہ روز دوپہر کو کروائے گئے تھے۔
یاد رہے کہ اس سے قبل پاکستان سپر لیگ میں اسلام آباد یونائیٹڈ کے لیگ سپنر فواد احمد سمیت چار افراد کے مثبت کورونا ٹیسٹ آنے کی تصدیق کی گئی تھی۔ اس طرح اب تک پی ایس ایل 6 میں کل سات افراد کے کورونا ٹیسٹ مثبت آ چکے ہیں جن میں پانچ کھلاڑی ہیں۔
پاکستان میں کورونا کی صورتحال کی نگرانی کرنے والے ادارے نیشنل کمانڈ اینڈ کنٹرول سنٹر (این سی او سی) کے اعداد و شمار کے مطابق گذشتہ 24 گھنٹوں کے دوران ملک میں کورونا کے باعث رواں سال کی سب سے زیادہ 75 ہلاکتیں ہوئی ہیں۔
پاکستان کرکٹ بورڈ کے ترجمان سمیع الحسن نے منگل کو بتایا تھا کہ ان میں دو غیر ملکی کرکٹرز اور ایک ملکی سپورٹ سٹاف شامل ہیں۔ ’تمام ملکی و غیر ملکی کرکٹرز اور سپورٹ سٹاف کے 244 پی سی آر ٹیسٹ کیے گئے تھے جن میں سے تین ٹیسٹ مثبت آئے ہیں۔‘
ان کا کہنا ہے کہ ان افراد کو 10 روزہ قرنطینہ میں منتقل کر دیا گیا ہے۔ ’یہ جاننا مشکل ہے کہ ٹیسٹ مثبت کیسے آئے۔۔۔ ایونٹ جس طرح شروع ہوا کوشش ہو گی کہ اسی طرح ختم ہو۔۔۔ میچز پروگرام کے مطابق کھیلے جائیں گے۔‘ یاد رہے کہ گذشتہ روز فواد احمد کا ٹیسٹ مثبت آنے کے بعد اسلام آباد یونائیٹڈ اور کوئٹہ گلیڈی ایٹرز کے درمیان ایک دن کے لیے ملتوی کر دیا گیا تھا۔ق
پی سی بی کے سمیع الحسن سے پوچھا گیا کہ پی ایس ایل میں حفاظتی تدابیر کے باوجود اب تک چار افراد کے ٹیسٹ مثبت کیسے آئے ہیں اور آیا کسی نے بائیو سکیور ببل کی خلاف ورزی کی تھی۔ اس پر انھوں نے بتایا کہ ’جو لوگ بھی ببل میں آئیں ہیں انھیں تین روز تک آئسولیشن میں رہنا ہوتا ہے اور ان کے دو منفی ٹیسٹ نتائج آنا ضروری ہوتا ہے۔‘
پی ایس ایل کے آغاز پر پشاور زلمی کے کپتان وہاب ریاض اور کوچ ڈیرن سیمی نے بائیو سکیور ببل کی خلاف ورزی کی تھی تاہم انھیں اس کے باوجود میچ کھیلنے کی اجازت مل گئی تھی۔ اس سلسلے میں زلمی کے حکام نے پی سی بی سے اپیل کی تھی جسے منظور کر لیا گیا تھا۔
سمیع الحسن نے بتایا کہ اس حوالے سے کوئی حتمی بات نہیں کہی جاسکتی کہ آیا گراؤنڈ میں داخل ہونے والے کسی شخص سے کورونا وائرس پھیلا یا اندرونی و بیرونی بائیو سکیور ببل کے کسی فرد نے اصولوں کی خلاف ورزی کی۔
پی سی بی نے فیصلہ کیا ہے کہ لاہور میں 16 مارچ تک کھیلے جانے والے میچوں میں پچاس فیصد شائقین کی حد برقرار رہے گی جبکہ پلے آف اور فائنل کے لیے تماشائیوں کی تعداد سو فیصد کرنے کا فیصلہ بعد میں ہوگا۔
سمیع الحسن نے بتایا کہ احتیاطی طور پر ’تین کرکٹرز کے مثبت ٹیسٹ آنے کے بعد نیشنل سٹیڈیم کراچی کے سٹاف اور براڈکاسٹر کے تمام ممبران کے پی سی آر ٹیسٹ کرائے گئے ہیں۔۔۔ یہ تعین کرنا بہت مشکل ہے کہ بائیو سکیور ببل کی خلاف ورزی کس طرح ہوئی ہے۔ لیکن یہ بات طے ہے کہ یہ بائیو سکیور ببل کمزور نہیں ہے۔‘
اس سے قبل آسٹریلین اوپن، فارمولا ون اور دیگر بین الاقوامی مقابلوں میں بھی اس طرح کے واقعات سامنے آچکے ہیں جس کا یہ مطلب نہییں کہ وہاں بھی بائیو سکیور ببل کمزور تھا تاہم انھوں نے تسلیم کیا کہ اس میں مزید بہتری کی گنجائش ہے۔ ’آج تمام کرکٹرز اور سپورٹ اسٹاف کے دوبارہ ٹیسٹ لیے جائیں گے۔‘
پاکستان سپر لیگ میں اسلام آباد یونائیٹڈ اور کوئٹہ گلیڈی ایٹرز کے درمیان پیر کو ہونے والا میچ ملتوی کر دیا گیا تھا اور اب یہ ایک دن کے وقفے کے ساتھ منگل کو کھیلا جائے گا۔ میچ ملتوی کیے جانے کا فیصلہ اسلام آباد یونائیٹڈ کے کھلاڑی فواد احمد کا کووڈ 19 ٹیسٹ مثبت آنے کے بعد کیا گیا ہے۔
پاکستان کرکٹ بورڈ کی جانب سے پہلے یہ بتایا گیا تھا کہ یہ میچ مقررہ وقت سے تاخیر کے بعد آٹھ بجے شروع ہوگا لیکن پھر یہ وقت نو بجے بتایا گیا۔ تاہم ساڑھے سات بجے یہ اعلان کیا گیا کہ یہ میچ اب منگل کی شام سات بجے کھیلا جائے گا۔
اسلام آباد یونائیٹڈ کے ترجمان نے اس بات کی تصدیق کردی تھی کہ ان کے کھلاڑی فواد احمد کا مثبت ٹیسٹ آیا ہے۔ دو روز قبل ان میں کووڈ کی علامات ظاہر ہوئی تھیں۔ ترجمان کے مطابق اسلام آباد یونائٹڈ کے دیگر کھلاڑیوں کے بھی کووڈ ٹیسٹ لیے گئے جو منفی آئے ہیں۔
پاکستان کرکٹ بورڈ کے ترجمان کے مطابق اس میچ میں حصہ لینے والی دوسری ٹیم کوئٹہ گلیڈی ایٹرز کے کھلاڑیوں کے بھی ریپڈ ٹیسٹ کیے گئے ہیں۔
