کویت اردو نیوز 09 مئی: دنیا کی مقبول ترین میسیجنگ ایپلی کیشن واٹس ایپ کی انتظامیہ نے گروپ ایڈمینز اور گروپ میں شامل ہونے کے خواہشمند صارفین کا بڑا مسئلہ حل کردیا ہے۔
واٹس ایپ پر اب تک ہر گروپ میں صرف 256 ارکان کو ہی شامل کیا جا سکتا تھا جس کی وجہ سے گروپ میں شامل ہونے کے خواہشمند کئی افراد تعداد پوری ہونے کے باعث گروپس میں شامل نہیں ہوپاتے تھے۔ اس پر صارفین اور گروپ ایڈمنز شکوہ کرتے بھی نظر آتے ہیں تاہم اب واٹس ایپ نے اس پریشانی کو حل کردیا ہے۔ واٹس ایپ نے کسی بھی گروپ میں ممبرز کی استعداد بڑھاتے ہوئے ارکان کی تعداد دگنی یعنی 512 کردی ہے۔ واٹس ایپ کی سرگرمیوں پر نظر رکھنے والی ویب سائٹ بیٹا انفو کے مطابق انتظامیہ نے نیا فیچر 5 مئی کو متعارف کروا دیا تھا تاہم فوری طور پر دنیا بھر کے صارفین مذکورہ فیچر تک رسائی حاصل نہیں کر پائیں گے۔
یہ بھی پڑھیں: واٹس ایپ نے فیس بک طرز کی نئی شاندار اپڈیٹ متعارف کرا دی
نئے فیچر کو استعمال کرنے کے لیے صارفین کو ایک سے ڈیڑھ ہفتہ انتظار کرنا پڑے گا جس کے بعد تقریبا تمام صارفین کو اس تک رسائی دے دی جائے گی۔ مذکورہ فیچر کو اگرچہ دنیا بھر کے صارفین کے لیے متعارف کرایا گیا ہے تاہم فوری طور پر اس سے برازیل سمیت دیگر چند ممالک کے لوگ استعمال نہیں کر پائیں گے۔
خیال رہے کہ واٹس ایپ نے حال ہی میں کسی بھی میسیج پر ’ری ایکشن‘ کے ذریعے رائے کا اظہار کرنے کا فیچر بھی متعارف کرایا تھا، ری ایکشن فیچر بلکل ایسے ہی کام کرے گا، جیسے فیس بک، انسٹاگرام اور مسینجر کے میسیج پر صارفین ایموجیز کے ذریعے اپنی رائے کا اظہار کرتے ہیں۔
