کویت اردو نیوز 04 نومبر: پیشہ تبدیل کرنے یا شرائط پوری نہ کرنے پر ہزاروں تارکین وطن اور کویتی شہریوں کے ڈرائیونگ لائسنس منسوخ کر دئیے گئے۔
تفصیلات کے مطابق مطلوبہ شرائط پر پورا نہ اترنے کی بنیاد پر مجموعی طور پر 32,000 ڈرائیونگ لائسنس غیر ملکیوں سے واپس لے لیے گئے اس کے علاوہ ایسے غیرملکی جنہوں نے رواں سال کے پہلے دس مہینوں میں غیر قانونی طور پر ڈرائیونگ لائسنس حاصل کیے تھے کینسل کر دئیے گئے۔ کویتی شہریوں کے 2,400 ڈرائیونگ لائسنس دماغی بیماری کی وجہ سے واپس لے لیے گئے جبکہ کچھ کو نظر میں کمزوری کی معذوری تھی جن میں اکثریت مردوں کی تھی۔ جنوری سے لے کر اکتوبر 2021 کے آخر تک نئے ڈرائیونگ لائسنس جاری کرنے میں 43 فیصد کی کمی واقع ہوئی ہے۔ روزنامہ الرای کی رپورٹ کے مطابق
یہ تعداد 72,000 ڈرائیونگ لائسنسوں سے 41,000 تک گر گئی۔ جنرل ٹریفک ڈپارٹمنٹ کے کرنل نواف الحیان نے بتایا کہ محکمہ ڈرائیونگ لائسنس جاری کرنے میں سختی کا مظاہرہ کرتا ہے خاص طور پر انہیں دیگر حکومتی وزارتوں سے جوڑنے کے بعد جن میں اقامتی امور، پبلک اتھارٹی برائے افرادی قوت اور اتھارٹی برائے معذور افراد کی وزارتیں شامل ہیں۔ غیر ملکی طلباء جو اپنی تعلیم مکمل کرنے کے بعد بھی ڈرائیونگ لائسنس استعمال کر رہے ہیں ان کے لائسنس پر بلاک رکھا گیا ہے۔ اس کے علاوہ جنہوں نے اپنا پیشہ تبدیل کیا تھا یا شرائط پوری نہیں کی تھیں ان کا لائسنس منسوخ کر دیا گیا ہے۔ یاد رہے کہ رہائشی اجازت نامے (اقامہ) کی تجدید اس وقت تک نہیں کی جائے گی جب تک کہ وہ اپنا ڈرائیونگ لائسنس محکمہ ٹریفک کو واپس نہیں دے دیتے۔
