کویت سٹی 30 مئی: روزنامہ عرب ٹائمز کی رپورٹ کے مطابق جزوی کرفیو کے دوران کام کے اوقات کے بارے میں کوآپریٹیو سوسائٹیوں کی ہونے والی میٹنگ میں سوسائٹیوں کی یونین کے چیئر پرسن فہد العنیزی نے وضاحت کی کہ صارفین کوآپریٹو سوسائٹیوں اور سپلائی برانچوں میں بغیر بکنگ داخل نہیں ہوسکیں گے صارفین کو وزارت تجارت و صنعت کی طرف سے نامزد کردہ ویب سائٹ کے ذریعے پہلے سے بکنگ اور بار کوڈ حاصل کرنا ہوگا جیسے اب تک صارفین حاصل کرتے رہے ہیں۔
العنیزی نے جزوی کرفیو کی مدت کے دوران سپر مارکیٹوں اور سپلائی برانچ کے اندر کام کے اوقات کے بارے میں کوآپریٹو سوسائٹیوں سے خطاب کیا انہوں نے اعلان کیا کہ کام کے اوقات صبح 8 بجے سے آدھی رات 12 بجے تک ہوں گے اور یہ کہ صارفین کو ویب سائٹ کے ذریعے بکنگ کے بعد ہی رسائی حاصل ہوسکتی ہے۔
انہوں نے مزید کہا کہ لاک ڈاؤن علاقے جن میں فروانیہ ، خیطان، نقرہ،میدان حولی اور حولی شامل ہیں ان علاقوں میں سپر مارکٹس چوبیس گھنٹے کام کریں گی۔ بلدیہ کی ایک پریس ریلیز میں اعلان کیا گیا کہ سپر مارکٹس اور کوآپریٹو سوسائٹیز کے علاوہ دیگر مارکٹس جزوی کرفیو سے پہلے مقامی وقت کے مطابق صبح 6 بجے سے شام 5:30 بجے تک کام کرسکیں گی۔ یہ پالیسی 31 مئی بروز اتوار سے شروع ہوگی۔
پریس ریلیز میں مزید کہا گیا ہے کہ اسی طرح تمام ادارے مکمل طور پر لاک ڈاؤن علاقوں میں 24 گھنٹے کام کریں گے۔ حال ہی میں کویت حکومت نے کورونا وائرس (COVID-19) کی روک تھام کے اقدامات کے ایک حصے کے طور پر ملک میں معمول کے احساس کو واپس لانے کے لئے ایک پانچ مرحلہ والا منصوبہ جاری کیا تھا۔ ہر مرحلے کو پورا ہونے میں ہفتوں کا وقت لگے گا اور حکام اس بات کا تعین کریں گے کہ ترقی پذیر صورتحال کے مطابق پابندیوں میں نرمی لانا ہے یا نہیں۔
حوالہ: عرب ٹائمز
