کویت اردو نیوز 06 اکتوبر: متحدہ عرب امارات نے وفاقی ملازمین کے لیے چھ روزہ چھٹی کے ساتھ تنخواہ دینے کا اعلان کر دیا۔
تفصیلات کے مطابق متحدہ عرب امارات بھر میں ایکسپو 2020 دبئی کا دورہ کرنے کی غرض سے لی جانے والی چھٹیوں کو تنخواہ کے ساتھ حاصل کرنے کا سنہرا موقع دیا گیا ہے۔ نئی سکیم کے تحت وفاقی حکومت کے ملازمین چھٹی کے ساتھ تنخواہ سے فائدہ اٹھا سکیں گے جس سے وہ ایکسپو 2020 دبئی کا دورہ کر سکیں گے جو کہ یکم اکتوبر 2021 سے مارچ 2022 کے اختتام تک منعقد ہو رہی ہے۔ متحدہ عرب امارات کی کابینہ جس کے سربراہ شیخ محمد بن راشد المکتوم جو کہ متحدہ عرب امارات کے نائب صدر و وزیر اعظم اور دبئی کے حکمران بھی ہیں نے آج بدھ کے روز چھ دن کی غیر معمولی
چھٹی دینے کے فیصلے کی منظوری دی تاکہ ملازمین اپنی فیملی کے ساتھ دبئی میں منعقد ایکسپو 2020 میلے کا دورہ کر سکیں اور عالمی میلوں میں ظاہر ہونے والی عالمی اختراعات کو سمجھیں۔ انہوں نے کہا کہ "ہمارا مقصد ایکسپو کے موضوع ‘ذہنوں کو جوڑنا ، مستقبل کی تشکیل کو عملی طور پر نافذ کرنا ہے اور ہم چاہتے ہیں کہ ہماری ٹیم پوری دنیا کے تخلیقی خیالات سے واقف ہو۔
اس بات کا اعلان شیخ محمد بن راشد المکتوم نے گذشتہ ماہ کیا تھا جس میں دبئی کے سرکاری ملازمین کے لیے چھ دن کی چھٹی کی منظوری دی گئی تھی۔ یاد رہے کہ اس ماہ کے شروع میں نائب وزیر اعظم اور صدارتی امور کے وزیر شیخ منصور بن زید النہیان نے بھی صدارتی امور کی وزارت کے ملازمین کے لیے آٹھ دن کی تنخواہ کی چھٹی کی منظوری دی تھی۔ دوسری جانب "کلداری برادرز” متحدہ عرب امارات کے پہلے نجی شعبے کے گروپوں میں سے ایک ہے جس نے اپنے ملازمین کو چھ دن کی چھٹی کے ساتھ تنخواہ دینے کا اعلان کیا ہے تاکہ وہ ایکسپو 2020 دبئی کے عجائبات کا تجربہ کرسکیں۔ اس گروپ نے ایکسپو کی مدت کے لیے ملازمین کے اوقات کار میں ایک گھنٹہ کی کمی کر دی تاکہ ان کے کام کی جگہوں سے جلدی نکلنے میں مدد ملے اور زیادہ ٹریفک والے اوقات سے بچا جا سکے۔
