کویت اردو نیوز 05 اکتوبر: وزارت داخلہ نے مرکزی اور رِنگ روڈ پر ڈلیوری موٹر سائیکلوں پر پابندی کے فیصلے کو 7 نومبر تک ملتوی کر دیا جبکہ حکومت سی گروسری کی اجازت دینے پر غور کر رہی ہے۔
تفصیلات کے مطابق وزارت داخلہ نے مرکزی اور رِنگ روڈ پر ڈلیوری موٹر سائیکلوں پر پابندی کے فیصلے پر عملدرآمد جو کہ اتوار سے نافذ ہونا تھا کو 7 نومبر تک ملتوی کر دیا ہے۔ ذرائع نے وضاحت کی کہ ملتوی کرنے کا فیصلہ فیڈریشن آف ریسٹورنٹس اور ڈیلیوری کمپنیوں کے ساتھ ہر موٹرسائیکل میں ضروری آلات لگانے کے معاہدے کے بعد لیا گیا ہے۔ ذرائع نے بتایا کہ موٹر سائیکل سواروں کو ان کے لیے مختص راستوں کے بارے میں آگاہ کیا جانا چاہیے۔ خلاف ورزی کی صورت میں ٹیکسٹ میسج یا خودکار نوٹیفکیشن کمپنی اور جنرل ٹریفک ڈیپارٹمنٹ کو بھیجا جائے گا جس میں قانونی حوالہ جات (مخالفہ) جاری کرنے سمیت
قانونی اقدامات کیے جائیں گے۔ ذرائع نے مزید کہا کہ بار بار خلاف ورزی کرنے والے فرد کو ملک بدر کیا جائے گا۔ ذرائع کے مطابق وزارت نے ڈیلیوری کمپنیوں اور ریستورانوں کو ہدایت کی کہ وہ ڈیلیوری موٹر سائیکلوں کے ڈرائیوروں کو ہیلمٹ پہننے اور موٹرسائیکل کے ڈبے پر عکاس اسٹیکر جیسے احتیاطی قوانین کی سختی سے پابندی کرنے کی تلقین کریں تاکہ دوسرے موٹرسوار انہیں رات کو دیکھ سکیں۔
دوسری جانب وزارت تجارت اور صنعت فی الحال ’سی گروسری (بحری گروسری) کے نام سے نئے لائسنس جاری کرنے کے خیال کا مطالعہ کر رہی ہے تاکہ سمندر میں سیر کی غرض سے آنے والوں کو اس قسم کی سروس دی جا سکے۔ ذرائع نے بتایا کہ وزارت نے یہ قدم کشتیوں پر گروسری اسٹورز قائم کرنے کے لیے شہریوں کی متعدد درخواستوں کے بعد اٹھایا ہے۔ ذرائع نے انکشاف کیا کہ یہ گروسری مختلف اقسام کے کھانے کی مصنوعات ، پانی ، جوس ، آئس کریم ، سگریٹ اور دیگر مصنوعات فروخت کرے گی جن کی صارف کو اکثر ضرورت درکار ہوتی ہے۔ اگر یہ تجویز منظور ہوجاتی ہے تو وزارت کویت بلدیہ اور ماحولیات پبلک اتھارٹی ساتھ مل کر اس قسم کی تجارتی سرگرمیوں کے لیے ضابطے وضع کرے گی۔
